ఆత్మవిశ్వాసం–ఆత్మరక్షణకు మార్షల్ ఆర్ట్స్ కీలకం

ఎల్.బి.నగర్ నియోజకవర్గ పరిధిలోని ప్రళవి గార్డెన్స్‌లో డైనమిక్ టైక్వాండో క్లబ్, గంఘాన్ టైక్వాండో అకాడమీ ఆధ్వర్యంలో నిర్వహించిన ప్రపంచ స్థాయి మార్షల్ ఆర్ట్స్ కలర్ బెల్ట్ ప్రమోషన్ టెస్ట్ కార్యక్రమం ఘనంగా జరిగింది.ఈ కార్యక్రమానికి ముఖ్య అతిథిగా టీపీసీసీ ప్రతినిధి, బ్లాక్ బెల్ట్, బాడీ బిల్డర్స్ అసోసియేషన్ రాష్ట్ర ఉపాధ్యక్షుడు, మాజీ జాతీయ బాడీ బిల్డర్ జక్కిడి ప్రభాకర్ రెడ్డి హాజరయ్యారు.ఈ సందర్భంగా ఆయన మాట్లాడుతూ, మార్షల్ ఆర్ట్స్ కేవలం ఒక క్రీడ మాత్రమే కాదని, అది ఆత్మవిశ్వాసం, ఆత్మరక్షణతో పాటు ప్రతి విద్యార్థి శరీరాన్ని మాత్రమే కాకుండా మనసును కూడా బలంగా తీర్చిదిద్దే గొప్ప విద్య అని అన్నారు. నేటి యువత మార్షల్ ఆర్ట్స్ నేర్చుకోవడం ద్వారా సమాజానికి అవసరమైన ధైర్యం, క్రమశిక్షణ అలవడుతుందని తెలిపారు.ముఖ్యంగా బాలికలు ఆత్మరక్షణలో ముందుండాలంటే మార్షల్ ఆర్ట్స్ ఎంతో అవసరమని పేర్కొన్నారు. ప్రతి విద్యార్థి ఉన్నత స్థాయికి ఎదగాలని మనస్ఫూర్తిగా కోరుకుంటూ, ప్రభుత్వం తరఫున ఎల్లప్పుడూ ప్రోత్సాహం అందిస్తామని భరోసా ఇచ్చారు.

ఈ కార్యక్రమంలో పరీక్షాధికారి ప్రవీణ్ కుమార్, కోచ్‌లు మణిదీప్, రజని, వెంకట్, సాయి కుమార్‌తో పాటు కాంగ్రెస్ పార్టీ నాయకులు, క్రీడాభిమానులు, విద్యార్థులు పాల్గొన్నారు.