ఫిబ్రవరి 17 నుంచి తిరిగి నిర్వహణ

హైదరాబాద్, ఫిబ్రవరి 02: రాష్ట్ర వ్యాప్తంగా మున్సిపల్ ఎన్నికలు నిర్వహిస్తున్న నేపథ్యంలో డా. బి.ఆర్. అంబేద్కర్ సార్వత్రిక విశ్వవిద్యాలయం డిగ్రీ పరీక్షలను వాయిదా వేస్తున్నట్లు విశ్వవిద్యాలయ అధికారులు ప్రకటించారు. ఈ నెల 11న ఎన్నికల కమిషన్ మున్సిపల్ ఎన్నికలను నిర్వహిస్తున్న కారణంగా పరీక్షలను వాయిదా వేసినట్లు తెలిపారు.

వాయిదా పడిన డిగ్రీ మొదటి, రెండవ, మూడవ సంవత్సరం వివిధ సెమిస్టర్ల పరీక్షలను ఫిబ్రవరి 17 నుంచి మార్చి 10, 2026 వరకు నిర్వహించనున్నట్లు పరీక్షల నియంత్రణాధికారి ప్రొఫెసర్ భోజు శ్రీనివాస్ వెల్లడించారు.పరీక్షలకు దరఖాస్తు చేసుకున్న విద్యార్థులు తమ పరీక్షకు మూడు రోజుల ముందు విశ్వవిద్యాలయ అధికారిక వెబ్ పోర్టల్ ద్వారా హాల్ టికెట్లు పొందవచ్చని సూచించారు. పరీక్షలకు సంబంధించిన మరిన్ని వివరాల కోసం సంబంధిత అధ్యయన కేంద్రాలను లేదా విశ్వవిద్యాలయ అధికారిక వెబ్ సైట్‌ను సంప్రదించాలని తెలిపారు.