స్థానికం ప్రధాన ప్రతినిధి కొండ మల్లేశం గౌడ్

యాదాద్రి భువనగిరి జిల్లాలోని గ్రామ పంచాయతీల్లో పనిచేస్తున్న గ్రామ పంచాయతీ సిబ్బంది (ఎంపీడబ్ల్యూలు)ను విధుల నుంచి తొలగించరాదని జిల్లా కలెక్టర్ (పంచాయతీ రాజ్ విభాగం) స్పష్టమైన ఆదేశాలు జారీ చేశారు.

ఈ మేరకు జిల్లా కలెక్టర్ కార్యాలయం నుంచి సర్క్యులర్ నెం.136/2026-ఎ (పంచా)ను 13 జనవరి 2026న విడుదల చేశారు. కొందరు గ్రామ పంచాయతీ సర్పంచులు కారణం లేకుండా గ్రామ పంచాయతీ సిబ్బందిని విధుల నుంచి తప్పిస్తున్నట్లు జిల్లా కలెక్టర్ దృష్టికి రావడంతో ఈ ఆదేశాలు జారీ చేసినట్లు సర్క్యులర్‌లో పేర్కొన్నారు.జిల్లాలో ప్రస్తుతం పనిచేస్తున్న గ్రామ పంచాయతీ సిబ్బంది (MPWs)లను ఎట్టి పరిస్థితుల్లోనూ గ్రామ పంచాయతీ విధుల నుంచి తొలగించకూడదని డివిజనల్ పంచాయతీ అధికారులు, మండల పంచాయతీ అధికారులు, పంచాయతీ కార్యదర్శులు, గ్రామ పంచాయతీ సర్పంచులకు ఆదేశాలు ఇచ్చారు.

ఈ సర్క్యులర్‌ను జిల్లాలోని అన్ని మండల పంచాయతీ అధికారులు, డివిజనల్ పంచాయతీ అధికారులు, సర్పంచులు, పంచాయతీ కార్యదర్శులు, మండల పరిషత్ అభివృద్ధి అధికారులు, జిల్లా పరిషత్ ముఖ్య కార్యనిర్వహణాధికారి, అదనపు కలెక్టర్ (లోకల్ బాడీస్), అలాగే పంచాయతీ రాజ్ & ఉపాధి కల్పన డైరెక్టర్‌కు ప్రతులు పంపించారు.

ఇది అత్యంత ముఖ్యమైన అంశంగా భావించి కఠినంగా అమలు చేయాలని జిల్లా కలెక్టర్ ఆదేశించారు.