నకిరేకల్‌లో సీసీ డ్రైనేజీ పనులకు ఊపిరి

ఎమ్మెల్యే వేముల వీరేశం సహకారంతో నాలుగో వార్డులో అభివృద్ధి

నకిరేకల్ స్థానికం ప్రధాన ప్రతినిధి

నకిరేకల్ మున్సిపాలిటీ పరిధిలోని నాలుగో వార్డులో సీసీ డ్రైనేజీ నిర్మాణ పనులు వేగంగా కొనసాగుతున్నాయి. నకిరేకల్ శాసనసభ్యుడు వేముల వీరేశం సహకారంతో చేపట్టిన ఈ అభివృద్ధి పనులు స్థానికులకు ఊరటనిస్తున్నాయి.నాలుగో వార్డు కౌన్సిలర్ గాజుల సుకన్య శ్రీనివాస్ సీసీ డ్రైనేజీ పనులను పర్యవేక్షించారు. ఈ సందర్భంగా కాంట్రాక్టర్‌తో మాట్లాడి, పనులను నాణ్యతతో పాటు నిర్ణీత గడువులో పూర్తి చేయాలని సూచించారు. ప్రజలకు దీర్ఘకాలికంగా ఉపయోగపడేలా పనుల్లో ఎలాంటి లోపాలు ఉండకూడదని స్పష్టం చేశారు.

ప్రాంతంలో మౌలిక వసతుల అభివృద్ధే లక్ష్యంగా పనిచేస్తున్నామని గాజుల సుకన్య శ్రీనివాస్ తెలిపారు. ఎమ్మెల్యే వేముల వీరేశం సహకారంతో నాలుగో వార్డులో అవసరమైన అభివృద్ధి పనులను దశలవారీగా చేపడుతున్నామని పేర్కొన్నారు.ఈ కార్యక్రమంలో కాంగ్రెస్ పార్టీ నాయకులు బండపల్లి శ్రీనివాస్, కాలనీ పెద్దలు, స్థానికులు పాల్గొన్నారు.