మరిపడిగలో అక్రమ మద్యానికి వ్యతిరేకంగా ప్రజల తిరుగుబాటు

గుండాల మండలంలోని మరిపడిగ గ్రామంలో అక్రమంగా కొనసాగుతున్న బెల్టు షాపులపై గ్రామ ప్రజలు, యువత ఐక్యంగా తిరుగుబాటు స్వరం వినిపించారు. ప్రభుత్వ నిబంధనలకు విరుద్ధంగా నడుస్తున్న అక్రమ మద్యం విక్రయాలు గ్రామ సామాజిక జీవనాన్ని అస్తవ్యస్తం చేస్తున్నాయని ఆరోపిస్తూ బెల్టు షాపులపై తక్షణమే నిషేధం విధించాలని డిమాండ్ చేశారు.గ్రామ పంచాయితీ కార్యాలయం ఎదుట నిర్వహించిన కార్యక్రమంలో గ్రామ యువత పెద్ద ఎత్తున పాల్గొని అక్రమ మద్యానికి వ్యతిరేకంగా నినాదాలు చేశారు. బెల్టు షాపుల వల్ల యువత భవిష్యత్తు నాశనమవుతుందని, మహిళలు, కుటుంబాలు తీవ్ర ఇబ్బందులు ఎదుర్కొంటున్నాయని ఆవేదన వ్యక్తం చేశారు. ఈ మేరకు గ్రామ పంచాయితీ సర్పంచ్‌కు వినతి పత్రం అందజేశారు.వినతి పత్రాన్ని స్వీకరించిన సర్పంచ్ గూడెపు కుమార్ మాట్లాడుతూ అక్రమ బెల్టు షాపుల వల్ల కలిగే సామాజిక దుష్పరిణామాలను తాము కూడా గమనిస్తున్నామని తెలిపారు. సంబంధిత అధికారులతో సమన్వయం చేసి అక్రమ మద్యం విక్రయాలపై కఠిన చర్యలు తీసుకుంటామని హామీ ఇచ్చారు.ఈ కార్యక్రమంలో ఉపసర్పంచ్ సొప్పరి సోమన్నతో పాటు గ్రామ పెద్దలు, యువకులు పాల్గొన్నారు. మద్యపాన రహిత గ్రామ నిర్మాణమే లక్ష్యంగా అందరూ ఐక్యంగా ముందుకు సాగాలని పిలుపునిచ్చారు. గ్రామాన్ని ఆదర్శ గ్రామంగా తీర్చిదిద్దేందుకు యువత ముందుకు రావడం అభినందనీయమని పలువురు పేర్కొన్నారు.