అల్లాదుర్గ్ మండల పరిధిలోని బహిరన్ దిబ్బ గ్రామంలో మద్య నిషేధం అమలు చేయాలనే ఉద్దేశంతో గ్రామ సర్పంచ్,వార్డు సభ్యులు,గ్రామ పెద్దలు,మహిళలు మరియు గ్రామస్తులు అందరూ కలిసి సమావేశం నిర్వహించారు. ఈ సమావేశంలో గ్రామ అభివృద్ధి, యువత భవిష్యత్,కుటుంబ సంక్షేమం దృష్ట్యా గ్రామంలో మద్యం వల్ల జరుగుతున్న సమస్యలను నివారించాలనే లక్ష్యంతో ఏకగ్రీవంగా మద్య నిషేధం అమలు చేయాలని తీర్మానం చేశారు.గ్రామంలో మద్యం విక్రయాలు, వినియోగం పూర్తిగా నిలిపివేయాలని, గ్రామ శాంతి భద్రతలు కాపాడుతూ ఆరోగ్యకరమైన వాతావరణం నెలకొల్పాలని నిర్ణయించారు.ఈ సందర్భంగా తీసుకున్న తీర్మాన ప్రతిని సంబంధిత పోలీస్ స్టేషన్‌కు అందజేసి,మద్య నిషేధం అమలుకు పోలీస్ శాఖ సహకారం అందించాలని కోరారు.గ్రామస్తుల ఐక్యతతో తీసుకున్న ఈ నిర్ణయం ఇతర గ్రామాలకు ఆదర్శంగా నిలవాలని, గ్రామం అభివృద్ధి పథంలో ముందుకు సాగాలని ఈ సందర్భంగా గ్రామ పెద్దలు ఆకాంక్షించారు.