వైద్యశాఖ అనుమతులు లేకుండా ఆర్ఎంపీ వైద్యంతో పాటు మెడికల్ షాప్ నిర్వహిస్తున్న వ్యక్తిని పోలీసులు అదుపులోకి తీసుకున్నారు. ఈ ఘటన ఎల్బీనగర్ పోలీస్ స్టేషన్ పరిధిలోని దిశ, చైతన్యపురి ప్రాంతంలో చోటుచేసుకుంది.

ఇన్‌స్పెక్టర్ కె. వినోద్ కుమార్ తెలిపిన వివరాల ప్రకారం సూర్యాపేట జిల్లా నూతనకల్ మండలం మిర్యాల గ్రామానికి చెందిన కేశోజు జలేంద్రచారి ఎన్టీఆర్ నగర్ ఫేజ్–3లో బాలాజీ మెడికల్, జనరల్ స్టోర్‌తో పాటు ఫస్ట్ ఎయిడ్ క్లినిక్‌ను ఇండియన్ మెడికల్ కౌన్సిల్ చట్టానికి విరుద్ధంగా నిర్వహిస్తున్నట్లు గుర్తించారు. ఈ విషయమై రంగారెడ్డి జిల్లా మాడుగుల మండలంలో మెడికల్ ఆఫీసర్‌గా పనిచేస్తున్న, భరత్ నగర్ నివాసి డాక్టర్ గోపాలకృష్ణ ఈ నెల 5న పోలీసులకు ఫిర్యాదు చేసినట్లు తెలిపారు.

ఫిర్యాదు అందుకున్న ఎస్సై సతీష్ సిబ్బందితో కలిసి తనిఖీలు చేపట్టగా నిబంధనలకు విరుద్ధంగా వైద్య సేవలు అందిస్తున్న విషయం నిర్ధారణ అయింది. విచారణలో నిందితుడు నేరానికి పాల్పడినట్లు అంగీకరించినట్లు పోలీసులు వెల్లడించారు.నిందితుడిని అదుపులోకి తీసుకుని అతని వద్ద నుంచి స్టెతస్కోప్, రక్తపోటు పరీక్ష యంత్రం, ఉష్ణోగ్రత కొలిచే పరికరం, ఫస్ట్ ఎయిడ్ క్లినిక్ పుస్తకం, గుర్తింపు కార్డును స్వాధీనం చేసుకున్నారు. కేసు నమోదు చేసి దర్యాప్తు కొనసాగిస్తున్నట్లు ఇన్‌స్పెక్టర్ తెలిపారు.ఈ ఘటనతో అనుమతులు లేకుండా వైద్య సేవలు అందించే వారిపై కఠిన చర్యలు తప్పవన్న హెచ్చరికను పోలీసులు మరోసారి స్పష్టం చేశారు.