హైదరాబాద్, ఫిబ్రవరి 6: డాక్టర్ బి.ఆర్. అంబేద్కర్ సార్వత్రిక విశ్వవిద్యాలయానికి ప్రత్యేక అధికారిగా ప్రొఫెసర్ రవీంద్రనాథ్ సోలమన్ నియమితులయ్యారు.ప్రస్తుతం విశ్వవిద్యాలయంలో పరిశోధన, గుర్తింపు విభాగం డైరెక్టర్‌గా, వాణిజ్య శాస్త్ర విభాగ ప్రొఫెసర్‌గా పనిచేస్తున్న సోలమన్‌కు అదనపు బాధ్యతలు అప్పగించినట్లు విశ్వవిద్యాలయ వర్గాలు వెల్లడించాయి.సోలమన్ 2008లో వాణిజ్య శాస్త్ర విభాగంలో సహాయ ప్రొఫెసర్‌గా విశ్వవిద్యాలయంలో చేరారు. అప్పటి నుంచి వివిధ పరిపాలనా బాధ్యతలను సమర్థవంతంగా నిర్వహిస్తూ అకడమిక్, పాలనా రంగాల్లో తనదైన ముద్ర వేశారు. విశ్వవిద్యాలయ అభివృద్ధి, విద్యా ప్రమాణాల మెరుగుదలలో ఆయన సేవలు కీలకంగా నిలిచినట్లు అధికారులు పేర్కొన్నారు.ప్రత్యేక అధికారిగా బాధ్యతలు స్వీకరించిన నేపథ్యంలో విశ్వవిద్యాలయ పాలన మరింత సమర్థవంతంగా సాగుతుందన్న ఆశాభావాన్ని అధ్యాపక వర్గాలు వ్యక్తం చేశాయి.