1986–2013 డిగ్రీ విద్యార్థులకు చివరి అవకాశం

హైదరాబాద్, స్థానికం ప్రధాన ప్రతినిధి

డా. బి.ఆర్. అంబేద్కర్ సార్వత్రిక విశ్వవిద్యాలయంలో పాత బ్యాచ్‌లకు చెందిన విద్యార్థులకు కోర్సులు పూర్తి చేసుకునేందుకు ప్రత్యేక అవకాశం కల్పిస్తున్నట్లు విశ్వవిద్యాలయం ప్రకటించింది. గతంలో చేరి, వివిధ కారణాలతో సకాలంలో డిగ్రీ పూర్తి చేయలేకపోయిన విద్యార్థుల విజ్ఞప్తులను పరిశీలించిన అనంతరం ‘స్పెషల్ రీ–అడ్మిషన్’ సౌకర్యాన్ని అందిస్తున్నట్లు విద్యార్థి సేవల విభాగం డైరెక్టర్ డా. వై. వెంకటేశ్వర్లు తెలిపారు.

విద్యా సంవత్సరం 1986 నుంచి 2013 వరకు బి.ఏ, బి.కాం, బి.ఎస్‌సి కోర్సుల్లో చేరిన పాత బ్యాచ్ విద్యార్థులు ఈ ప్రత్యేక రీ–అడ్మిషన్‌కు అర్హులని వెల్లడించారు. గతంలో విశ్వవిద్యాలయంలో చదువుకుని మధ్యలో నిలిచిపోయిన వారు, తమ డిగ్రీ పూర్తిచేసుకునేందుకు ఇదే చివరి అవకాశం అని స్పష్టం చేశారు.రీ–అడ్మిషన్ పొందాలనుకునే విద్యార్థులు జూబ్లీహిల్స్‌లోని అంబేద్కర్ ఓపెన్ యూనివర్సిటీ ప్రధాన కార్యాలయంలో విద్యార్థి సేవల విభాగాన్ని సంప్రదించాలని సూచించారు. రీ–అడ్మిషన్ పొందిన విద్యార్థులకు డిసెంబర్ 2026 వరకు నిర్వహించే పరీక్షలకు హాజరయ్యేందుకు రెండు అవకాశాలు కల్పించనున్నట్లు తెలిపారు.

మరిన్ని వివరాల కోసం అభ్యర్థులు విశ్వవిద్యాలయ అధికారిక వెబ్‌సైట్ www.braou.ac.in ను సందర్శించవచ్చని, లేదా కాల్ సెంటర్ 1800 599 0101, హెల్ప్‌డెస్క్ నంబర్లు 040–23680–222 / 333 / 555 లలో సంప్రదించాలని సూచించారు.