ఎస్సీ విద్యార్థుల కోసం ప్రైవేట్ స్కూళ్ల ఎంపికకు నోటిఫికేషన్

యాదాద్రి భువనగిరి,

తెలంగాణ ప్రభుత్వ షెడ్యూల్డ్ కులాల అభివృద్ధి శాఖ ఆధ్వర్యంలో అమలు చేస్తున్న ‘బెస్ట్ అవైలెబుల్ స్కీమ్’ కింద ప్రైవేట్ పాఠశాలల యాజమాన్యాల నుంచి దరఖాస్తులు ఆహ్వానిస్తున్నట్లు జిల్లా షెడ్యూల్డ్ కులాల అభివృద్ధి అధికారి (ఇంచార్జ్) పి. సాహితి తెలిపారు.

2026–27 విద్యాసంవత్సరానికి సంబంధించి ఎస్సీ విద్యార్థులను 1వ తరగతి (డే స్కాలర్), 5వ తరగతి (రెసిడెన్షియల్) ఇంగ్లిష్ మీడియం పాఠశాలల్లో చేర్చేందుకు ఆసక్తి ఉన్న పాఠశాలలు దరఖాస్తులు సమర్పించాలని కోరారు.

దరఖాస్తుల సమర్పణకు చివరి తేదీ ఈ నెల 31గా నిర్ణయించినట్లు తెలిపారు. పూర్తి వివరాలకు రాయగిరిలోని కలెక్టరేట్ భవన సముదాయంలో ఉన్న జిల్లా షెడ్యూల్డ్ కులాల అభివృద్ధి కార్యాలయం (రూమ్ నంబర్ S-17)ను సంప్రదించాలని సూచించారు.

అర్హత నిబంధనల ప్రకారం పాఠశాలలు ప్రభుత్వ గుర్తింపు పొంది ఉండాలి. గత ఐదు సంవత్సరాలుగా పదో తరగతి ఫలితాల్లో 90 శాతం పైగా ఉత్తీర్ణత, అందులో కనీసం 50 శాతం ఫస్ట్ క్లాస్ ఉండాలి. స్కూల్, హాస్టల్‌కు సంబంధించిన మౌలిక సదుపాయాలు ఉండాలి. ఫీజు వివరాలు, సిబ్బంది నియామకం ప్రభుత్వ నిబంధనలకు అనుగుణంగా ఉండాలి. అలాగే పాఠశాల సొంత భవనం కలిగి ఉండాలని తెలిపారు