ఆకట్టుకున్న కామెరాన్ గ్రీన్ పోరాటం ఐపీఎల్ 25వ మ్యాచ్‌లో 5 వికెట్ల తేడాతో టైటాన్స్ గెలుపు

ఐపీఎల్‌లో భాగంగా జరిగిన 25వ టీ20 మ్యాచ్‌లో గుజరాత్ టైటాన్స్ (GT) అదరగొట్టింది. ఆద్యంతం ఆసక్తికరంగా సాగిన ఈ పోరులో కోల్‌కతా నైట్ రైడర్స్ (KKR)పై 5 వికెట్ల తేడాతో ఘన విజయం సాధించింది. కెప్టెన్ శుభ్‌మన్ గిల్ (86) బాధ్యతాయుతమైన ఇన్నింగ్స్‌తో చెలరేగడంతో 181 పరుగుల లక్ష్యాన్ని గుజరాత్ మరో 2 బంతులు మిగిలి ఉండగానే ఛేదించింది. మొదట బ్యాటింగ్ చేసిన కోల్‌కతా 20 ఓవర్లలో 180 పరుగులకు ఆలౌట్ అయింది.

గ్రీన్ ఒంటరి పోరాటం..

టాస్ గెలిచిన గుజరాత్ టైటాన్స్ మొదట బౌలింగ్ ఎంచుకుంది. బ్యాటింగ్‌కు దిగిన కోల్‌కతాకు ఆదిలోనే భారీ షాక్ తగిలింది. ఓపెనర్ అజింక్య రహానే (0) ఖాతా తెరవకుండానే సిరాజ్ బౌలింగ్‌లో వెనుదిరిగాడు. మరో ఓపెనర్ సైఫర్ట్ (19), రఘువంశీ (8) కూడా త్వరగానే పెవిలియన్ చేరారు. ఈ క్లిష్ట దశలో క్రీజులోకి వచ్చిన కామెరాన్ గ్రీన్ అద్భుత ఇన్నింగ్స్‌తో ఆకట్టుకున్నాడు. గుజరాత్ బౌలర్లను దీటుగా ఎదుర్కొంటూ 55 బంతుల్లో 7 ఫోర్లు, 4 సిక్సర్లతో 79 పరుగులు చేసి స్కోరు బోర్డును పరుగులు పెట్టించాడు. అతనికి రోవ్‌మన్ పావెల్ (27) కాస్త సహకరించాడు.అయితే మిగతా బ్యాటర్లు విఫలం కావడంతో కోల్‌కతా సరిగ్గా 20 ఓవర్లలో 180 పరుగులకు కుప్పకూలింది.

గుజరాత్ బౌలర్ల విజృంభణ: టైటాన్స్ బౌలర్లలో కగిసో రబడ (3/29) కచ్చితమైన బంతులతో కోల్‌కతాను దెబ్బతీయగా, మహ్మద్ సిరాజ్ (2/23), అశోక్ శర్మ (2/45) తలా రెండు వికెట్లు పడగొట్టారు. ప్రసిద్ధ్ కృష్ణ, రషీద్ ఖాన్ చెరో వికెట్ తీశారు.

గిల్ కెప్టెన్సీ ఇన్నింగ్స్..

181 పరుగుల లక్ష్య ఛేదనకు దిగిన గుజరాత్‌కు కెప్టెన్ శుభ్‌మన్ గిల్ అద్భుతమైన బేస్ సెట్ చేశాడు. క్రీజులో అడుగుపెట్టినప్పటి నుంచే ఆధిపత్యం చెలాయించిన గిల్ 50 బంతుల్లో 8 ఫోర్లు, 4 భారీ సిక్సర్లతో 86 పరుగులు చేసి మ్యాచ్‌ను గుజరాత్ వైపు తిప్పాడు. మరో ఎండ్‌లో సాయి సుదర్శన్ (22), వికెట్ కీపర్ జోస్ బట్లర్ (25; 15 బంతుల్లో 2 ఫోర్లు, 2 సిక్సర్లు) విలువైన పరుగులు జోడించారు. చివర్లో వాషింగ్టన్ సుందర్ (13), గ్లెన్ ఫిలిప్స్ (19) స్వల్ప వ్యవధిలో పెవిలియన్ చేరినా, రాహుల్ తెవాటియా (7 నాటౌట్) ఎలాంటి ఒత్తిడికి గురికాకుండా 19.4 ఓవర్లలో జట్టుకు విజయాన్ని అందించాడు.

కోల్‌కతా బౌలర్లలో వరుణ్ చక్రవర్తి (2/34) రెండు వికెట్లు తీయగా, వైభవ్ అరోరా, సునీల్ నరైన్, రమణ్‌దీప్ సింగ్ తలా ఒక వికెట్ దక్కించుకున్నారు.

సంక్షిప్త స్కోర్లు:

కోల్‌కతా నైట్ రైడర్స్ (KKR): 180/10 (20.0 ఓవర్లలో)

(కామెరాన్ గ్రీన్ 79, రోవ్‌మన్ పావెల్ 27; కగిసో రబడ 3/29, మహ్మద్ సిరాజ్ 2/23)

గుజరాత్ టైటాన్స్ (GT): 181/5 (19.4 ఓవర్లలో)

(శుభ్‌మన్ గిల్ 86, జోస్ బట్లర్ 25; వరుణ్ చక్రవర్తి 2/34, సునీల్ నరైన్ 1/28).