మీసేవ సెంటర్ల చుట్టూ తిరిగే పని లేదు

80969 58096 నంబర్‌కు మెసేజ్ చేస్తే చాలు

కుల, ఆదాయ, జనన ధృవీకరణ పత్రాలు క్షణాల్లో మీ మొబైల్‌కు

హైదరాబాద్, (మన స్థానికం):

తెలంగాణ ప్రజలకు శుభవార్త. ప్రభుత్వ కార్యాలయాలు, మీసేవ కేంద్రాల చుట్టూ తిరిగే అవసరం లేకుండా, రాష్ట్ర ప్రభుత్వం పౌర సేవలను మరింత చేరువ చేసింది. దాదాపు 580 రకాల ప్రభుత్వ సేవలను (G2C Services) ఇకపై నేరుగా వాట్సాప్ ద్వారానే పొందే వెసులుబాటును ఐటీ శాఖ మంత్రి శ్రీధర్ బాబు ఇటీవల ప్రారంభించారు.

ఎలా ఉపయోగించుకోవాలి? పౌరులు తమ మొబైల్ నుండి 80969 58096 అనే నంబర్‌ను సేవ్ చేసుకుని, వాట్సాప్‌లో 'Hi' లేదా 'Menu' అని మెసేజ్ పంపాలి. వెంటనే ఆర్టిఫిషియల్ ఇంటెలిజెన్స్ (AI) సహాయంతో పనిచేసే చాట్‌బాట్ స్పందిస్తుంది. అక్కడ కనిపించే మెనూ నుండి కావాల్సిన సేవను ఎంచుకుని వివరాలు సమర్పించాలి.

అందుబాటులో ఉన్న ప్రధాన సేవలు:

1. సర్టిఫికెట్లు: కుల (Caste), ఆదాయ (Income), నివాస (Residence), జనన (Birth), మరణ (Death) ధృవీకరణ పత్రాలు.
2. బిల్లుల చెల్లింపు: కరెంట్ బిల్లులు, నల్లా బిల్లులు, ఆస్తి పన్ను (Property Tax) చెల్లింపులు.
3. ఇతర సేవలు: పోలీస్ చలాన్ల చెల్లింపు, విద్యార్థుల హాల్ టికెట్ల డౌన్‌లోడ్, పెన్షన్ వివరాలు, మరియు భూముల రికార్డులు.

ఈ విధానం ద్వారా దరఖాస్తు చేసుకున్న తర్వాత, సర్టిఫికెట్ మంజూరైన వెంటనే వాట్సాప్‌లోనే PDF రూపంలో డౌన్‌లోడ్ చేసుకోవచ్చు. ప్రస్తుతం ఇంగ్లీష్‌లో ఉన్న ఈ సేవలు త్వరలోనే తెలుగు మరియు ఉర్దూ భాషల్లో కూడా అందుబాటులోకి రానున్నాయి.