రేషన్ సేవలు ఇక యాప్‌లోనే

కేంద్రం గుడ్ న్యూస్.

ఇంటి నుంచే అన్ని సేవలు

రేషన్ కార్డు సేవలు ఆన్‌లైన్‌లోకి.. కేంద్రం గుడ్ న్యూస్

న్యూఢిల్లీ: రేషన్ కార్డు సేవలను మరింత సులభంగా అందుబాటులోకి తీసుకురావడానికి కేంద్ర ప్రభుత్వం డిజిటల్ విధానాన్ని ప్రవేశపెట్టింది. ఇకపై ఉమాంగ్ యాప్‌లోని ‘మేరా రేషన్’ ఫీచర్ ద్వారా ప్రజలు రేషన్ కార్డు సంబంధిత పలు సేవలను ఇంటి నుంచే పొందవచ్చు.

ఈ ఫీచర్ ద్వారా కొత్త రేషన్ కార్డు కోసం దరఖాస్తు చేయడం, దరఖాస్తు స్థితి (స్టేటస్) తెలుసుకోవడం, ఎంత రేషన్ మంజూరైందో, ఎంత తీసుకున్నారో వంటి వివరాలను సులభంగా పరిశీలించవచ్చు. అలాగే రేషన్ వినియోగాన్ని ట్రాక్ చేయడం, సమీపంలోని రేషన్ దుకాణాలను గుర్తించడం, గత లావాదేవీల వివరాలను కూడా చూడవచ్చు.

దీంతో ప్రభుత్వ కార్యాలయాలు లేదా రేషన్ షాపుల చుట్టూ తిరగాల్సిన అవసరం లేకుండా ప్రజలకు సేవలు వేగంగా అందనున్నాయని అధికారులు తెలిపారు. ఈ నిర్ణయం ద్వారా పారదర్శకత పెరగడంతో పాటు రేషన్ పంపిణీ వ్యవస్థ మరింత సమర్థవంతంగా మారనుంది.