దేశ ఇంధన రంగంలో కొత్త సాంకేతికతగా ఫ్లవర్ టర్బైన్లు ప్రాచుర్యం పొందుతున్నాయి. ఇప్పటివరకు ఇంటి పైకప్పులపై సోలార్ ప్యానెల్స్ ఎక్కువగా కనిపిస్తుండగా, ఇప్పుడు పూల మొగ్గ ఆకారంలో ఉండే ఈ గాలి విద్యుత్ యంత్రాలు ప్రజల దృష్టిని ఆకర్షిస్తున్నాయి.

ఫ్లవర్ టర్బైన్లు నిలువు అక్షంపై తిరుగుతూ గాలి శక్తిని విద్యుత్‌గా మార్చుతాయి. సాధారణ గాలి చక్రాల్లా పెద్ద రెక్కలు లేకుండా పనిచేయడం వీటి ప్రత్యేకత. వీటి పని సమయంలో శబ్దం చాలా తక్కువగా ఉండటం వల్ల నివాస ప్రాంతాల్లో కూడా సులభంగా అమర్చుకోవచ్చు.

ఈ టర్బైన్లు 300 వాట్లు నుంచి 5 కిలోవాట్ల వరకు సామర్థ్యంతో లభిస్తున్నాయి. ఒక కిలోవాట్ సామర్థ్యం గల టర్బైన్ ధర సుమారు రూ.85 వేల నుంచి రూ.1.50 లక్షల వరకు ఉండవచ్చని సమాచారం.

ఇంటి డాబా లేదా బాల్కనీలో కూడా వీటిని అమర్చుకోవచ్చు. గాలి వేగం తక్కువగా ఉన్నప్పటికీ ఇవి తిరిగి విద్యుత్ ఉత్పత్తి చేయగలవని నిపుణులు చెబుతున్నారు.

సోలార్ ప్యానెల్స్ పగలు మాత్రమే పనిచేయగా, ఫ్లవర్ టర్బైన్లు గాలి వీచినప్పుడల్లా పగలు, రాత్రి తేడా లేకుండా విద్యుత్ ఉత్పత్తి చేయగలవని తెలిపారు.

అందమైన ఆకృతి, తక్కువ శబ్దం, పర్యావరణానికి హాని లేకపోవడం వంటి లక్షణాల వల్ల ఫ్లవర్ టర్బైన్లు భవిష్యత్‌లో గృహ విద్యుత్ ఉత్పత్తిలో కొత్త మార్గంగా నిలవవచ్చని నిపుణులు అభిప్రాయపడుతున్నారు.