కొన్నేళ్ల క్రితం అన్న నాగరాజు.. ఇప్పుడు లారీ ఢీకొని తమ్ముడు శివ మృతి

రామన్నపేట: కుటుంబానికి పెద్ద దిక్కుగా ఉంటూ మేస్త్రి పని చేసుకుంటూ జీవనం సాగిస్తున్న ముత్యాల శివ (నీర్నేముల) రోడ్డు ప్రమాదంలో మృతి చెందడం ఆ కుటుంబంలో తీవ్ర విషాదాన్ని నింపింది. వ్యక్తిగత పనుల నిమిత్తం చిట్యాలకు వెళ్లిన శివను లారీ ఢీకొనడంతో అక్కడికక్కడే మృతిచెందినట్లు స్థానికులు తెలిపారు.

శివ మృతితో నీర్నేముల గ్రామంలో విషాదఛాయలు అలుముకున్నాయి. కుటుంబ సభ్యులు, బంధువుల రోదనలు మిన్నంటాయి. ఇదే కుటుంబానికి చెందిన శివ అన్న నాగరాజు కూడా కొన్నేళ్ల క్రితం రోడ్డు ప్రమాదంలోనే మృతిచెందడం మరింత విషాదాన్ని నింపింది.

అప్పుడు అన్నను.. ఇప్పుడు తమ్ముడిని కోల్పోవడంతో ఆ కుటుంబం కన్నీరుమున్నీరవుతోంది. ఒకే కుటుంబంలో ఇద్దరు సోదరులు ప్రమాదాల్లో ప్రాణాలు కోల్పోవడంతో గ్రామస్థులు తీవ్ర దిగ్భ్రాంతి వ్యక్తం చేస్తున్నారు.